مصيري انسى وقلبي يقسى ..خياليه ... رومنسيه

مصيري أنسى و قلبي يقسى ..خياليه .. رومنسيه
~~~~~~~~~~~~~~~~~~~~~~~~~~~~~~~~

[color=darkblue]أول قصه منتدى لحضه من فضل
وأتمنى تحوز <<
ماني شاطره في حط المقدمات لكن عندي عدد من التحذيرات
والتي يجب التقيد بها خلال قراءة الستوري..
1- ولا أحد يقراها وهو مصدع >> فيه لخبطه صغيرونه
2- نصيحه لكل الأمهات في المنتدى بعدم قراءتها لأنها
وللأسف تجيب النحس لأولادكن >>مرة خالي قرتها ويوم
اندمجت ومادرينا ألا ولدها مدخل في خشمه مسمار !!
والموقف المؤسف الثاني بنت خالي كانت بعد تقراها ومادرينا
ألا ولدها متعلق بالثريا !!
3- تحذير لكل بنات خالي وخالاتي
وبنات خال أمي من الرضاع >> مشتاقه موووت <<
وبنوتات احلى كشته في العالم كشتت ساجر>>لازم نكررها<<
>>ماهو موضوعي هاذي كشته حقيقيه<<
يمنع منعاً باتاً كتابة أسمي الحقيقي ...
4- الله لا يحلل ولا يبيح الي بينسبها له وأنا ماأخترت منتداكم ألا
لأني واثقه من حمايتكم لحقوق الكاتب
محبتكم // حره على كف صقار
.
..
.
.
الفصل الأول
السعوديه /الرياض 7:00
~~~~~~~~~~~~
الجو مشحون بالتوتر الثقيل على النفس والانتظار الممل زاد
عن حدة بالنسبه لمحمد و غازي الي كانوا يحسبون الثواني
عشان يوصلون لغايتهم ...
محمد : غازي هدي يمكن ريان مكبر الموضوع
(محمد إنسان عصبي ومزاجي لابعد الحدود, يتمتع بالوسامة
الهاديه الطابع الي يغلب على حياته هو الطابع العملي
شخصية بصراحة مميزة,وموب أي احد يقدر يدخل قلبه
ويثق فيه .. قليل الي قدروا يحصلون على ثقته ..عمره 27سنه)
غازي: .......................
محمد وهو معصب :غازي رد عليّ لولا الطريق الي انا ماسكه
والظروف الي حنا فيها كان ماجلست جنبي متعافي...
غازي متلطم بشماغه ولابس نظارته السوداء عشان يخفي
نظرات الخوف والحزن والانكسار النادرة عليه, كيف ما يحزن
ويزعل وصديقه الي رافقه اكثر من 25سنة بين الحياة والموت؟
صحيح ان ريان يموت في المزح والمقالب بس هاالامور مافيها مزح
غازي: محمد تكفى ماني رايق لك..
( غازي الدنيا في نظره امه واخواته الثلاث كل طلباتهم مستجابة,
طيب وحنون وأوقات العكس وهاالشيء مع ناس معينين تعرفونهم
مع الأحداث .. وسامته فيها العزه والشموخ ومبين من ملامحه
ورسمة وجهه ثقته الكبيره في نفسه الي غالبية الناس يحسبونها
غرور.. عمره 27 سنه )
في هااللحظات قطع عليهم الصمت صوت راشدالماجد :
دلوعتي كل الحلا فيها ..
احترت انا مدري شسميها ..
في حسنها كن البدر ضاوي ..
اخت القمر محدن يساويها ..
لف محمد على غازي وهو يبتسم ..
أبتسم غازي ولف للمرتبه الخلفيه من سيارة محمد الBMW
لأنه رمى جواله بعد مكالمته مع " ريان " وأخذ جهازه وبدون
مايشوف الأسم رد !!
لأنه حاط لها هالنغمه خاصه أنها تشبه أوصافها كثير..
غازي : الوو..هلا بالدلوعه ..
:هلا وينك ؟؟ ليه أنحشت ؟؟ أنت واعدني حاصل شي؟؟ انت زعلان
من كلام ماما ؟؟ تأخرت ربع ساعه ليه ؟؟
غازي: ههه .. رنيم حبه .. حبه .. آسف ياعمري حصل عندي
ظروف في الشغل وأجلت الطلعه.
رنيم:غاااازي .. حرام أنت قلت بتطلع معي .
غازي: غناتي قولي لأمي ولا ريماس وأسيل يطلعون معك
رنيم: غازي.. أنت فيك شيء .. والله حاسه غازي سطام فيه شي
غازي والليل هاذي وش عرفها :لا يارنو مافيه شي كلنا بخير..
رنيم:أجل عطني بسمع صوته ..
غازي:أقول ورا .. ماتقضبين الباب .. عطيناك وجه بزياده ,
عيني عينك ..تكلمين الولد
رنيم:أي ولد؟ هذا ولد عموو...خيوو
غازي:رنيم..حبيبتي..اتصل فيك بعدين
رنيم:لـــــــــيـــــه؟؟؟
غازي:رنيم..انا مشغول يا الله باي..
رنيم:بايوو..
بعدماسكر..غازي..لف على محمد وقال:بلغتوا تركي ولا لا ؟؟
محمد ونظره على الطريق:يقول ريان أنه قاله.
سكت غازي وجلس يتابع الطريق...
وقطع الصمت للمرة الثانيه جوال محمد بنغمة نوكيا العاديه
ناظر الاسم وقفل الجول بعد ماقفله ...
كانو توهم واصلين مستشفى((دله)),,نزلوا وغازي مرتبك
بزيادة..شافوا..ريان.. واقف عند مدخل الطوارىء ووجهه
مبين عادي.

~~~~~~~~~~~~
..غازي..
يارب مايكون الحادث خطير يارب لاتفرقنا...
يارب هو اخوي الي ماجابته امي..
ياناس لا تلوموني..
تخيلوا اعز إنسان على قلبك حصله حادث
ولا يندرى عن حالته حي ولا ميت..
احس اني مكتوم ولاني قادر اتنفس..
كله من..ريان.. لو يطمنا كان هانت علي
..ياناس مهما يكون هذا ولد عمي سندي عزوتي هذا الغالي
..سطام..
هذا نصفي الثاني,,الشخص الي رافقني في تشييد امبراطورية
(آل سلطان)
صحيح أن أحنا من قبيله مشهورة وعريقة ولها أسمها
وأي شخص يفخر إذا ختم أسمه بها ..
لكن أحنا أخترنا أسم الشخص الي اسس قبلنا الشركات
وربانا وعلمنا..اسم جدي ـ الله يرحمه ـ
,قطعت افكاري اول ما شفت ..ريان.. كان وجهه عادي
مثل ماقلت وهادي على غير العاده << متعودين على رجته
حتى في أصعب المواقف .. حاس بشيء.. بس أتمنى تكون
تواقعاتي غلط .. أتمنى ..
~~~~~~~~~~~~~~~~~~
* تعرفتم على الخمسة أبطال لقصتي
الي جمعتهم صداقتهم من الطفوله
* مافيه بينهم قرابه بس سطام وغازي
وهم عيال عم ...
~~~~~~~~~~~~~~~~~~
في مكان بعيد عن ديرتنا الغاليه..

الأجواء هنا مكدره خلقه لكن محاولة ترطيبها ممكنه ....
في الرياض وبنفس الوقت لكن بحي بعيد جداً عن الرفاهيه
~~~~~~~~~~
أووووص ....ولا كلمه أن سمعت صوتك دفنتك ..
يمه.... خوفتيني ... قولي وين الأكل بطني يوجعني...
كوولي تبن ..أي أكل أنتي الثانيه الله يعافي بيي زرط << أبتلع
الأكل كله أصبري لين بكره ..
نجوى ممكن أقول لهزاع يجيب لنا أكل من البوفيه ؟؟
نجوى:لا والله هذا الي ناقص ..تكفين طسي أنتي ماوراك مدرسه
ولا أقول هزاعووه أربع وعشرين ساعه مطيح عندنا ..
خلينا نستفيد منه ... بس ياويلك ياعهيد أن عرف أنا نستغله
عهود: أمرك ياباشا.. ولا تخافين دلخ وجيبه مليان وش نبي أكثر
نجوى:دسي لي من البلعه ولا تنسين حطي لي أكثر شي ولد خالتي
على الفاضي يعني ؟
طلعت بدون خوف عمها اليوم الصبح رايح ومارح يرجع ألا بعد
أسبوع ..
دخلت الصاله الصغيره ولقت عروب تتابع البرايم حق "ميشن فاشن"
وهزاع فاق خشته ويقز في العارضات الي مطلعات سيقانهن..
قالت في نفسها>> هذا ونت في أول متوسط <<
عهود:هزاع إذا جا الفاصل رح جب لنا عشا لأنك رجال البيت..
هزاع: ألا صح أنا رجال << توك تذكر وش تبون عشاكم؟
عهود بحيره:عروب وش تبين؟؟
عروب والي كانت نعساته:ابي 2 شاورما
عهود:أهب عليك يالدوبا ..2.. مره وحده حشا فرامه
عروب وهي تصحصح: لا أبي فلافل
عهود براحه نسبيه:خلاص هزاع جب لنا كلانا فلافل
هزاع وهو يأخذ شماغه:والعربجي الي داخل وش يبي؟
عهود بأبتسامه:ياويلك أن سمعتك .... والله لتسدحك في الأرض
حط رجله ومايشوفن ألا غباره طبعاً هاذي ( نجوى ) > قول وفعل<
~~~~~~~~~~~~~
عوده لعاصمة الأناقه والجمال – باريس 6:00 قرنيتش
~~~~~~~~
رفال
مسكينه ياملوك إذا صدق تحبين تركي هو الحين عمره26 ومانضج
أو حتى عقل وقعد يفكر بمسؤوليه .. أقدر أقول عكسك تماماً
والأعظم أن أبوي مستحيل يزوجنا من برا القبيله...
كذا الحب على قولتهم عذاب ...
سمعت صوت شموخ:رف رف .. وين رحتي؟؟
جاوبتها: ولا مكان .. آسفه ..بنات مارح أقدر أرجع معكم
صديق تركي حصل له حادث ورح يرجع يتطمن عليه ...
تحمست ملوك وسألت: بتروحون الليله؟؟
رديت بأستغراب: لا بكره ماحصل تركي حجز اليوم
ماأعرف لكن حسيت بخيبة أملها..
رجعت وقالت:شوشو أنا آسفه ياعمري ماحكون معاكي وأنتي جايه
لسعوديه ماما عندها أشغال كثيره..
أندهشت شموخ: كيف يعني تقولون لي بنرجع معاكي ورجلنا على
رجلك ومأعرف أيش..
حتى أنتي ياشموخ مسكينه الله يأخذ الي كان
سبب خوفك وتهربك من رجعتك لسعوديه ...
ملوك:لا تظلميني أنتي عارفه أني كنت برجع بس
ماما عندها أشغال .. وماأعرف أيش
كانت تقلد طريقة شموخ في الحكي ..اصلاً شموخ..
ماأحد يعرف يقلدها لكن هاالأيام فرحتها وبسمتها حتى دلعها
فيه أنكسار ما عرفناه فيها ماأقول غير حسبي الله على الظالم
قطع علينا سوالفنا ودعاوي صوت السياره الي دخلت؟
أول مرره أشوف هالسياره ؟؟
~~~~~~~~~
شموخ
وقفت وأنا مبتسمه هاذي فرحتي ودنيتي هاذي الغلا أفرح إذا
جت هي وأبوها العم(حمد)..
نزلت من السياره لكن بمظهر ما تعودت عليه ؟؟
كانت لا بسه فستان أسود إلى ركبتها !!
وين العم حمد مستحيل يخليها تجي لوحدها ؟؟ وينه؟؟
في عيونها دموع ؟؟!!
وين العم حمد؟؟
وأتمنى من كل قلبي أنها تلقى أعجابكم وتشجيعكم........
حره على كف صقار







تعم أجواء الحيره والتساؤل حب المغامره مع خوف من المجهول
يمكن تكون هالأجواء فتنة باريس ويمكن لا ؟؟
فرنسا / باريس 4 عصراً بتوقيت قرينتش..
~~~~~~~~
- مستحيل خالي مارح يسمح لي
- مافي شيء مستحيل يا خبلة انتي حاولي
- ملوك انتي تلعبين عليّ ولا على نفسك خالي ..
ملوك : عارفة خالي يكره دول الخليج وبالا خص السعودية
.. شموخ .. هاذي قناعة عند خالك ما حتقدري تغيريها ..
وبعدين انتي مصدقة انه يهتم فيك .. اصحي خالك فرنسي
ولا بعد مسيحي .. يعني تقدرين وبكل بساطة ترجعين لسعودية
بفلوس امك وابوك الي في رصيدك ..
شموخ : بس .. انا خايفة اني ما اندمج وأتأقلم مع المجتمع
ملوك : لا تخافين .. انتي سعودية ومسألة التأقلم خليها عليّ
- يانذلات ..من وراي تخططون وتقررون ؟؟!!
هاذي خيانه ولا عظمى بعد ..!!
لفوا البنات على صوتها وفزوا يسلمون عليها..
شموخ: واوو .. رفال متى وصلتي ؟؟
رفال: بصراحه توني وصله من المطار دايركت على الفيلا
ملوك: ياحياتي يارفال أقنعيها معي ..
رمت رفال شنطتها البينك وجلست مع البنات


وشبكت يدينها وقالت:على شوو؟؟ لا يكون رفضت تجي
لسعوديه؟؟؟
ملوك:سامعه حتى رفال متوقعه رجعتك .. بليز.. ارجعي
شموخ: ...دكوغ... أنا موافقه ارجع بس وين أروح؟؟؟؟
رفال: تجي في بيتي او بيت ملوك ...كلنا واحد...
شموخ:نو.. فهمتوني غلط.. لو على البيت أخلي سيلفان
يشتري فيلا لي ...لكن قصدي وحسب الفكرة الي في بالي...
انو الحياه صعبه بدون اهل هناك ...ماهو زي فرنسا ..
ملوك:لا أنتي .. بتزعليني أحنا أهلك .. وناني سوزي بتجي معك
يعني الموضوع سهل
رفال: اوكي ..أتفقنا ..الأسبوع الجاي كلنا نروح ...
شموخ: بس ..
رفال : شميخ..<<أسم التعصيب .. لا تقعدين تبسبسين
بقول لتركي يحجز لكم معنا الأسبوع الجاي .. مستحيل أفوت
شكلك وأنتي تشوفين السعوديه لأول مره..
ملوك: من قلتي يحجز لنا ؟؟
رفال وهي مستغربه:تركي!
ملوك:تركي بيجي ؟؟
شموخ وهي تقرصها وبصوت واطي: بس يابقره فضحتي نفسك
رفعت صوتها:قصدها أنها .. تتغطى عنه
رفال وهي تضحك في داخلها (لو تدري ياتركي وش بقول عنك):
لا وش دعوه تركي حسبة أخوكم ..وبعدين تركي مايناظر البنات
الي مو من محارمه.. أخوي معقد شوي
شموخ في نفسها(طول عمرك ذكيه.. الحين تركي مايناظر البنات
بصراحه كذبه ولا أروع):خلاص بقول لسيلفان يشتري الفيلا
بس وش الحي الي أشتري فيه ؟؟






smi:: [/colorجزء منفصل عن بقية القصه حالياً...
في ديرة أهل الرخا والشده الرطوبه واصله لأعلى درجاتها ..
الحزن والخوف من المستقبل ..
العيش بدون مأوى أو أهل أو حتى حب ..
كان يعج ويعصف في جو هالشقه الصغيره الي تقع في حي ال...
السعوديه /جده 9:00
كان يشوف نفسه لما كان عمره 15سنه عاش العذاب بكل أنواعه
أجبره عمه على شرب الخمر وهو ماله في هالدنيا ألا هالعم
وإذا ماطلع على قد المسؤوليه فعلى الدنيا السلام ..
وفي لحظات شاف ولد خالته يطق الباب وهو يلهث كان خايف
من عمانه وعماته الي كانوا يفرغون شحنات غضبهم على أخوهم
الي سرق حلالهم في ولده مشعل ..
من دون تفكير أطلق رجلينه في الهواء وترك شي أسمه الرياض..
سافروا مع خليل الشاب الجداوي الي كان يمثل أكبر عون لهم..
حطهم عند عمه فايز أو مثل مايقولون عم الكل ...
ومرت الأيام وهذا هو عمره (25) سنه ..
تغير شي؟؟؟
حصل شي؟؟؟
قام وهو متضايق يكره هالحلم وهالذكرى ..
شاف الساعه ولف لولد خالته الي كان غرقان في النوم..
أبتسم وبدأ يقومه..
مشعلوووه قم .. قامت قيامتك .. يلعن شكلك كل هذا نوم .. قم
مشعل:فهد أنقلع عني لا أتصرف تصرف يعجبك ..
فهد: خوفتني يا حلوو .. قم خل عنك الخرطي..
مشعل وهو يدور بعيونه في الغرفه ويشوف الساعه
ويفز:يامتخلف ..ماقلت لك قومني مع الآذان؟
فهد وهو يفرك عيونه :لا تأمرر مانيب خدام أبوك وأنا توني قايم
مشعل ويأخذ الفوطه والروب: مشكور فهد راحت علينا المقابله
ودخل مشعل للحمام -الله يكرمكم- بسرعه عشان فهد مايضربه
بالمخده ... فهد وهو يرفع صوته : وأنا وش ذنبي هاه؟؟
أف ..هاذي غرفة آوادم ولا زريبه؟؟
لف بسرعه وشاف بدر:الله يخسك خوفتني...
بدروهو يرمي نفسه على السرير المتهالك:آه..توني جاي من الدكان..
تفأل فهد وهو يطالعه..:هاه بشر قبل يشغلك عنده ؟؟؟
طالع فيه بنظره حزن:أهاني ..ذلني.. كرهني في نفسي وفي
الأخير..طردني..
" فهد "
جلست أواسيه وأنا عارف أني أواسي نفسي
على الأقل الشقه هاذي ساكنينها ببلاش
الله يخلينا عم " فايز" مقدر ظروفنا ويعتبرنا عياله
لكن المشكله أن ولا واحد فينا رضا يشتغل عنده ..
لأنا نحس بالخجل كل مانشوفه ..
بعرفكم علينا أنا فهد أبيض طويل نحيف وعمري 25 ولي أختين
عروب/عمرها18 وعهود /أصغر منها بسنه وعايشين مع عمي في
الرياض وعمي له بنت وهي أختي من الرضاع وأسمها نجوى18
يمكن أنا أخف معاناه من أصحابي أنا ماكنت أكثر..
مشعل يتيم ولكن قسوة الناس الي تربا عندهم أجبرته أنه يهرب يوم
صار عمره 16 ... والحين عمره 26 عضل وطويل وأسمر ...
أنا منحاش من عمي الي مايشرف .. كنت بكمل وأقول سالفة بدر
لكن صوته قطع عليّ حبل أفكاري ..
بدر:تصدق .. أن عمي فايز << كلنا نقول عمي لأنه كبير في السن
ومغرقنا بأفضاله عرض عليّ أتزوج بنته سلمى!!
هاهاي الدنيا مصالح ........!!
وأنا الي كنت أحسبه يرحمنا أثاريه طلع بينهي عنوسة بنته على أيد
واحد منا ..!!
:وش ردك ؟؟
بدر وهويعقد حواجبه:أنهبلت ولا أنهبلت تبيني آخذ وحده كبر جدتي؟
قلت بتفكير أن هذا هو الحل عشان نفتك من حياة النكد الي نعيشها :
ليه لا .. لو أنه عرض عليّ كان وافقت من دون تفكير..
لاتنسى أن العماير والمطاعم والمحلات في الأخير بترجع لها ..
بدر وهو معصب :لا يافهد أنا غير بنت عمي ماآخذ..
قلت بتعجب: لا يكون قصدك (..
ماقدرت أكمل ولا أتكلم لأن صوت الصرخه الي سمعناها
وقفت شعر راسي من الخوف ؟؟؟؟؟؟؟؟!!!
~~~~~~~~~~~~~~~~~~~~
ولعيون منور شخصية ريان..
(ريان من عائله غنيه جداً جداً ..أمه متوفيه بعد ولادتها لأخته روز
يكون العضو الرابع في شلة الزعيم والي تتكون من
غازي سطام محمد ريان تركي ..
أنسان حياته كلها مزح ومقالب
ولا شخص يدخل عنده الأ يطلع وهو يمسح دموعه من كثر الضحك
جدي في اعمال الشركه .. ولا بنت تشوفه ألا تخق لكن مقارنه مع
سطام يعتبر مملوح .. عمره 26 )
جو بارد غائم مشوب باليأس والحزن يغطي سماء ريان ...
>> صارت نشره جويه<<
في نفس الوقت لكن في الرياض ..
ـ كان حاط شماغه على كتفه والطاقيه في سيارته ومقفل جواله...
وسارح في أفكاره.........
- من متى وأنت تعاني؟؟؟
- وأنا الي ما فهمت سر آلامك ألا اليوم !
- ليه يا (سطام ) ليه ؟؟
- ليه رفضت أقول لهم العلم تطور!؟!
- فيه كثير مثل حالتك وتعالجوا!!
- الخبيث ..الخبيث وأنت بها البرود الي يقتل ؟؟
- خوفتني ببرودك موب كأنك بتودعنا بعد
أيام... شهور... سنه... الله أعلم
قطع عليه تفكيره واسئلته الي كان ناوي يقولها ل( سطام )
بكاء روز........
" ريان "
الحين منحاش ومادخلت البيت عشان مايزيد همي تجين ياروز
رحت لها طيران وشلتها على ظهري
:وش في الحلو زعلان ؟؟
قالت وهي تشاهق وتضمني من ور وتمسح دموعها في ثوبي:
دربتني أبير >> ضربتني عبير...
قلت لها وأنا أركض فيها : ماعاش الي يخلي حبيبة ريان تبكي
جلست تضحك :ريان قول لها تروح أنا ماأحبها
ليتها تموت وأفتك منها ومن قرفها :خلاص إذاجا أبوي قولي له
قالت ونا أدخل بها للصاله الرئيسيه:تيب
دخلتها وأنا أركض لأني ماأبي أقابل وجهها السموح ..
سمعت روز صوتها ورانا وقعدت تبكي :خلها تروح ..
للأسف ماأقدر أسوي شي ياروز..
عبير:ريااااان لا تعطيني ظهرك وأنا أكلمك ولا أصمخ
متى كلمتني لفيت لها وبكل رحابة صدر:
أتمنى أقوم بكره وألقاك يافي العده يافي القبر
وكملت طريقي وهي تفور ..
رحت لجناح روز وحطيتها في سريرها وقعدت أقولها قصة


البطه الي ولدها لونه أزرق وجلست عندها لين نامت ..
رحت لجناح ريوف من باب التطفل ليس ألا
<< القصه الي قريتها لروز مأثره فيني >>
لقيتها جالسه على النت أختي ذي ربي فاتنها بالقصص
المهم عطتني نظره ناريه بما معنى ليه ماطقيت الباب
كنت بتكلم مادريت ألا ذاك الصاروخ المنطلق نحونا بأقصى سرعه
>> الله يأخذ الي يقرا لروز قصه بعد ليوم<<
لو أنه راكان :ألحقوا....... ألحقوا
ويفتح الشباك عقدت حواجبي وش بعد؟؟
راكان :تعال شف
رحت وطليت براسي <<أجل برجلك
وإذا به محمد الي ولا يوم يمر عليّ ألا لازم أشوفه معصب
وهل مره وش أنا مسوي ؟؟؟
ضحك راكان :ياويلك .. وش أنت مسوي له؟؟
أنا طالعت في راكان مدري بس شكله متغير: مانيب عارف!!
نزلت تحت بسرعه ورحت للمسبح وفتحت الأنوار ودقيت عليه
ويوم جيت بنطق..
محمد:سيارتك فيه ..مانيب خبل ..أطلع لي كانك ولد أبوك..
رديت عليه وأنا ماسك الضحكه :أفا .. يابو حميد وش أنا مسوي؟
على مأظن عصب زياده:لا بريء ..كل الي سويته وماسويت شيء
بتجيني ولا ذبحتك على يدي ..
:خلاص أنا في المسبح
سكر الجوال في وجهي ........ وش أنا مسوي ؟؟؟
وصلوا عند ريان الي وجهه كان خالي من أي تعابير ممكن
تدلهم على الخبر ...
أول ماقربوا من عنده مايشوفون ألا الأبتسامه الي تشق الوجه
قال:صـــــــــــــادوووووه
عصب محمد وكردة فعل سريعه نزل نعوله ولحق ريان يبي
يضربه فيها .. وريان قرط في ثوبه ودقها كعابي لمواقف السيارات
غازي أبتسم >> الولد هذا مايخلي هباله لو أيش مايصير وقال
شكلي كبرت الموضوع ...
دخل غازي وأتجه للرسبشن .. ولما جا بينطق الأسم لف لو سطام
وراهورجله اليسرى مجبسه وضمه بكل قوته
وقال وهوضامه :حمدلله على السلامه ...
ورد سطام بعد ماتركه غازي بكل خجل من خوف غازي المبالغ فيه
:الله يسلمك .. عرفت ريماس ولالا ؟؟
جاوب غازي بمزح: يعني طول وعرض ما أكفيك ؟؟
ضحك سطام لكن لمعة الحزن الي في عيونهما فاتت غازي
الي تجاهلهاوقال :ماودك نطلع ؟؟
رد سطام:أجل دق على محمد يوصلنا ؟؟
أبتسم غازي وهو مستغرب :ليه ماهو أنا الي أوصلك؟
حك سطام رسه وقال:لا ماأظن ..خابرك لا رأتبكت مستحيل تسوق
حتى لوسيكل ..
أبتسم غازي ودق على محمد ووصلهم وهو يتوعد في ريان ..
~~~~~~~~~~~~~
عائلة ريان:
الأب/ خالد رجل أعمال كبير جداً
زوجته / عببير أنسانه خيثه نذله بمعنى الكلمه ماهيب جميله<في نظري
ريوف/هاديه ومسالمه وتشبه بريتني سبيرز مرره لكنها
أنعم وعيونها أوسع عمرها 20سنه
راكان/ قدوته في الحياه ريان عيونه ناعسه عايش مراهقته
على أصولها عمره17 سنه
روز/ بعد ولادتها بيومين توفت أمها .. دبدوبه وبيضاء عمرها4 سنوات
~~~~~~~~~~~~~~~





]

مشكورة اختي على الجهد الكبير على القصة الجميلة

مشكوره اختي عالقصه


تقبلي مرووري